طنط سوسن و عمو حسن

 


طنط سوسن و عمو حسن متجوزين و عندهم ولدين و بنت ... عمو حسن عنده 60 سنة و بيشتغل موظف حكومة ... عمو حسن دايماً بيستهزأ بولاده و ولاد اخواته و بيصفهم بأنهم جيل فاشل و ضايع عشان بيحاولوا يعملوا مشاريع مستقلة و يبحثوا عن فرص عمل أفضل ... عمو حسن عمره ما خاطر بفلوس عشان يفتح مشروع و عمره ما فكر يدور على وظيفة أفضل .. لأن وظيفة الحكومة وفرت له الحد الأدني من الأمان الإجتماعي. 

عمو حسن كان بيأيد عبد الناصر و الوحدة العربية و الإشتراكية و معاداة إسرائيل ... و بعدين أيد السادات و شتم العرب و هلل للرأسمالية و الإنفتاح و ساند معاهدة السلام ... و لما مسك حسني مبارك الحكم أيد الإستقرار .. عمو حسن دلوقتي بيأيد السيسي طبعاً ... 

طنط سوسن عندها 58 سنة .. بس لسة مصرة تلبس مشجر و تربط الطرحة لورا ... طنط سوسن مرعوبة .... مرعوبة  من الثورة و من التغيير .. و مرعوبة من دينها و من الإسلاميين و مرعوبة من الارهابين اللي عمرها ما شافتهم ... طنط سوسن حاطة على البروفيل بتاعها صورة مكتوب عليها يحيا جيش مصر ... بس اليومين دول بتحاول تشوف واسطة لأبنها الكبير عشان ما يدخلش الجيش ،،، لأنها عايزاه يسافر برا يشوف مستقبله .. 

عمو حسن شايف أن الثورة كانت مؤامرة عشان تدخل البلد في فوضى ... عمو حسن كان بيدخل جمعية كل سنة عشان يدفع مصاريف المدارس الخاصة لأولاده لأنه كان عارف إن مدارس الحكومة حتضيع مستقبلهم ....

طنط سوسن بتشتم الخونة و أعداء الإستقرار ... طنط سوسن تعبت السنة إللي فاتت و دخلت إتعالجت في مستشفى خاصة عشان مستشفيات الحكومة مش على مستوى الخدمة المطلوب ... 

طنط سوسن و عمو حسن الاتنين مقتنعين أن بقية العالم بيتآمر على مصر عشان البلد تضيع  ... عمو حسن على دراية واسعة جداً بالذي يجري في سائر أنحاء العالم من مؤامرات لأنه متابع جيد للتلفزيون المصري و قارئ معتاد للصحف و الجرائد ... و طبعاً منقطع تماماً عن مشاهدة أي قناة من قنوات المعارضة العميلة .. و ده وسع مداركه جداً و خلاه بياخد مواقفه كلها بناء على المعلومات الدقيقة المتاحة له. 


طنط سوسن و عمو حسن حينقرضوا ،،، و دي ضروة بيولوجية بتفرضها علينا نواميس الكون .... ساعتها حيكون العالم أفضل و ستكون مناقشتنا أكثر منطقية،،

تعليقات

إرسال تعليق

المشاركات الشائعة من هذه المدونة

البدلة

  ربما كان صيف ٩٢ أو ٩٣ .. كنا على مشارف عيد الأضحى .. يومئذٍ قررت ان اصنع شيئًا يختلف … قررت أن ابدو غير تقليدي فى هذه السنة … سوف ارتدى بدلة جديدة فى العيد … لابد أن اكون انيقًا جدًا  … سأكون متميزًا عن باقى الأولاد … أبى و أمى لم يعترضا إطلاقًا و أحترما رغبتى بشكل غير مسبوق … فقط كان تنويه بسيط عن حرارة الجو و أن البدلة ثقيلة على هذا الوقت من العام … لكنى لم أبالى … لا بأس من بعض الحرارة  .. هذه معاناة ضئيلة إذا قارناها بالشعور الرائع الذى سأشعر به عندما يرانى الجميع فى كامل اناقتي يوم العيد و يمدحني الجميع أكثر من غيرى من الأولاد … خطف الأنظار كان أهم عندى من شعور الحر المؤقت.  جاء يوم العيد المنتظر بعد سجالات عديدة و ليالى طويلة أحاول أن اختار فيها لون البدلة و الكرافت و القميص و الجزمة … كل شئ كان على ما يرام … شكل البدلة فى المرآه كان تمامًا مثل ما تخيلته … جميل جدًا …  لكن طبعًا لو سار كل شئ كما توقعت لما كان هناك داعي لهذا المقال من اصله …. لابد ان تأتى الرياح بما لا تشتهي السفن ..  فى بداية اليوم لم اشعر بأى معاناة حتى بدأ اولاد خالى و أولاد خالات...
قراءة المزيد

الجاذبية و خفة الظل

 اللى شاهد مسرحية المتزوجون حيجد إن شخصية مسعود التى قام بها سمير غانم هى شخصية شاب إنتهازى بيستغل حب بنت طمعاً فى مال ابوها … لكن طوال أحداث المسرحية انت لا تشعر بأى شئ غريب و قاعد تضحك معاه و بتغض الطرف تماماً عن انتهازيته اللى جرحت البنت اكثر من مرة … و فى الجانب الأخر تجد شخصية نبيل اللى قام بها ياسر جلال فى مسلسل لن أعيش فى جلباب ابى ..  اجتمع على كرها كل الناس اللى فى مصر … مع انها نفس الشخصية بتفاصيلها .. نفس الأنانية و الأنتهازية و الطمع … لكن الحقيقة أن هناك فرق واضح .. إن مسعود كان شاب دمه خفيف جداً ..  فى أحد اللقاءات مع سعيد صالح كان بيتكلم عن صداقته القديمه بعادل إمام  و ذكر أنهم كانوا شباب متعبين و قليلى الأدب ( لكن الناس كانت بتفوت و تستحملهم عشان دمهم خفيف) ..  من فترة قام أحد الشباب بالنصب على الفتيات فى اوروبا بأموال تعد بالمليارات عن طريق مواعدتهن من خلال مواقع التواصل… و الغريبة انه لا يوجد سبب جعل هؤلاء الفتيات يخرجن كل هذه الأموال من جيوبهن سوى ان الشاب شديد الوسامة …  كثير من الناس بيتم النصب عليهم بحركات قديمة و ليس فيها أى إبداع .. ...
قراءة المزيد