كيف تختار مجال عمل مناسب لشخصيتك
لما تيجي تختار كارير لازم تكون فاهم كويس انت هدفك ايه من الشغل أصلًا … مبدئيًا فكرة انك تشتغل عشان هي دي قيمتك في المجتمع أو عشان تكون إنسان منتج هي فكرة رأس مالية سخيفة تم زرعها في دماغ الناس في الأصل عن طريق أصحاب الثروات عشان يخلوك تحس إنك سعيد و انت بتشتغل عندهم … انت متصور انك عضو فعال في المجتمع و هو محفظته بتتملي فلوس …
إحنا الحقيقة كلنا بنشتغل لأن دي ضرورة للبقاء على قيد الحياة … لأننا محتاجين فلوس نوفر بيها ضروريتنا الأساسية في المعيشة … و لو الضروريات دي اتوفرت بأي سبل أخرى ( ورثت أو كسبت ياناصيب ولا عملت فيديو طلع تريند) طبيعي إنك مش حتشتغل و حتقعد تستمتع بفلوسك و توفر على نفسك حرقة الدم و التعامل مع الناس و مع المديرين.
لكن طالما إحنا مضطرين نشتغل يبقى لازم و أنت بتبحث عن كارير تكون فاهم انت عاوز منه ايه بالظبط … هل هدفك هو الفلوس؟ ولا هدفك انك تقضي أطول وقت ممكن في البيت و عالقهوة ؟ ولا عايز شغلانة تكون صعبة ومليانة تحديات و محتاجة منك انك تتعلم مهارات جديدة باستمرار عشان ماتزهقش ؟ … ولا عايز شغلانة فيها أكشن و مشاكلها كتير عشان تحس إنك عايز ترجع الشغل تاني يرم عشان تعرف إيه اللي حيحصل بكرة؟ ..
مش عيب انك تكون بتحب الخروج و الفسح و قعدة القهوة مع صحابك و ده كل هدفك أصلًا … دور على كارير ساعاته مريحة و قليلة عشان تقضي بقية وقتك في الأماكن اللي انت بتحبها …
لو عايز فلوس دور على كارير فلوسه حلوة حتى لو ساعات شغله طويلة .
لو بتزهق بسرعة دور علي كارير ظروفه بتتغير كتير…
و مفيش إجابة صحيحة للسؤال ده … الإجابة بتكون متفصلة على مقاس كل واحد و بتختلف من شخصية للتانية.
المفهوم ده أهم من مفهوم حعمل كام أو انا بحب الكارير ده ولا لاء …لو شغلك محققلكش هدفك الرئيسي من الحياة… حتكره شغلك و حتكره نفسك و حتكره حياتك حتى لو انت حابب الكارير ده في الأصل .
تعليقات
إرسال تعليق